The Sugar Brothers شوگر بھائی اور شوگر برادری

مندرجہ ذیل گرافکس کو ڈبل کلک کریں۔ آپ مزید بہتر منظرنامہ کے لیے کنٹرول پلس کیز دبائیں

Please double click on the images given below. You can further increase the display size by using Ctrl+ Keys

You can also read the Unicode Version by scrolling down this page

آپ اس مضمون کا یونی کوڈ ورژن اس صفحہ کے نچلے حصہ میں پڑھ سکتے ہیں

چند دن پہلے میں ایک ڈنر پر مدعو تھا۔ ڈائننگ ٹیبل پر مختلف اقسام کے کھانے چنے گئے تھے اور احباب پرتکلف عشائیہ اڑارہے تھے لیکن ایک صاحب ساتھ بیٹھے تو تھے لیکن کھا کچھ نہیں رہے تھے۔ پلیٹ میں دو ایک اشیا ڈال کر ادھر ادھر لوگوں کو حسرت سے کھاتا ہوا دیکھ رہے تھے۔ ایسے میں میزبان کا گزر ہوا اور وہ رنگے ہاتھوں پکڑے گئے۔

میزبان نے انھیں ہاتھ روکا ہوا پایا تو وہیں ٹھہر گئے اور مختلف اشیا ان کی پلیٹ میں ڈال کر تکلف برتنے کی وجہ دریافت کی۔ مہمان کچھ دیر ٹالتے رہے لیکن جب اصرار بڑھا توانھوں نے بتایا۔ ’دراصل میں کھانے سے پہلے کھانے

کی شوگر کی گولی بھول آیا ہوں۔ اس لیے احتیاط کررہا ہوں'۔ میزبان نے جواب میں کہا۔’آپ نے خواہ مخواہ تکلف کیا۔ پہلے بتاتے اب تک گولی کا انتظام ہوگیا ہوتا۔ خیر اب بھی دیر نہیں ہوئی۔ محفل میں کئی ’شوگر بھائی‘ موجود ہیں ان کے پاس سے آپ کی گولی برآمد ہوجائے گی بلکہ میں خود آپ کا شوگر بھائی ہوں لیکن میں انجکشن لیتا ہوں۔ آپ کو انجکشن تو نہیں چاہیے؟‘

’نہیں۔‘ مہمان نے جواب دیا۔ ’مجھے آپ اپنا چھوٹا بھائی سمجھیں۔ میں صبح اور شام کھانے سے پہلے ایک گولی لیتا ہوں۔‘

میزبان اور مہمان کی گفتگو سن کر تیسرے شوگر بھائی نے شوگر کی گولی کا کچھ بھلا سا نام لے کر آفر دیا۔ ’آپ فلاں دوا تو استعمال نہیں کرتے، وہ میرے پاس ہے۔‘

’نہیں، میرے ڈاکٹر نے فلاں گولی لکھی ہے۔ ‘ مہمان نے اپنی گولی کا نام بتایا۔

’یہ گولی میں بھی کھاتا ہوں۔ بہت اچھی دوا ہے۔ لیکن صرف صبح میں ۔‘ چوتھے شوگر برادر نے اطلاع دے کر معذرت چاہی۔ ’معاف کرنا اس وقت میرے ساتھ نہیں ہے۔‘

’کوئی بات نہیں، میرے پاس آپ دونوں کی گولی ہے۔‘ پانچویں شوگر بھائی نے مسئلہ حل کردیا۔ ’میں صبح، دوپہر اور شام ایک گولی استعمال کرتا ہوں اور ہر وقت یہ گولیاں میری جیب میں پڑی رہتی ہیں۔‘

مہمان نے گولی کھائی اور ڈنر سے انصاف کرنے لگے۔ میزبان شوگر بھائی کو توقع کے مطابق شوگر کی گولی کا انتظام ہوگیا تو انھوں نے سینہ پھلاکر کہا۔ ’ہماری برادری میں اضافہ ہورہا ہے۔اب ہم پہلے جیسے کم کم نہیں رہے۔ ‘

شوگر بھائی بہت صحیح فرماتے ہیں۔ چالیس پچاس برس پہلے شوگر کا مرض اتنا عام نہیں تھا جتنا اب ہے۔ اس وقت کسی کسی کو یہ مرض ہوتا تھا۔ مریض کھاتے پیتے اور صاحب ثروت ہوتے تھے، گویا شوگر کا مرض اسٹیٹس سمبل تھا۔ بڑے لوگ بڑے فخر سے کہتے تھے کہ مجھے شوگر ہے۔ لیکن اب یہ مرض ہرکس وناکس کو ہونے لگا ہے۔ جنس کی تخصیص ہے اور نہ عمر کی قید، جسے دیکھیے شوگر تیارکرتا دکھائی دیتا ہے۔ ضروری نہیں کہ شوگر کا مریض بیمار بھی ہو یا بیمار جیسا نظر آئے۔ بظاہر صحت مند شخص شوگر میں مبتلا ہوسکتا ہے۔ میں نے ایک توانا اور تندرست شخص سے مل کر اس کی صحت کی تعریف کی تو اس نے انکشاف کیا۔ ’اچھی صحت کہاں اور کس کی ہے صاحب، دو سال سے بندہ شوگر کا کیس ہے۔‘

شکایات نہ ہونے سبب پچاس فیصد سے زیادہ ’بغیر تشخیص یافتہ‘ مریض ہیں۔ یعنی انھیں یہ نہیں معلوم کہ ان کا تعلق شوگر برادری سے ہے۔ اسی لیے کچھ کہا نہیں جاسکتا کہ کسے شوگر ہے اور کسے شوگر نہیں ہے۔ خون کا معائنہ ہی فیصلہ صادر کرتا ہے کہ کون شوگر کا مارا ہے۔ ماہرین کہتے ہیں کہ شوگر ہر کسی کے خون میں دوڑتی رہتی ہے جو انھیں دوڑائے رکھنے میں معاون ہے۔ جب کسی کے اندر شوگر حد سے زیادہ بڑھنے لگتی ہے توشوگر کا مرض لاحق ہوتا ہے۔

شوگر برادری کی صحیح تعداد کا اندازہ نہیں ہے، کوئی کچھ کہتا ہے تو کوئی کچھ۔ لیکن ہمارا تجربہ اور ماہرین کے جمع شدہ اعدادوشمار بتاتے ہیں کہ شوگر برادری میں بڑی تیزی سے اضافہ ہورہا ہے۔ میں نے چند دن پہلے اخبار میں پڑھا تھا کہ شوگر برادری میں اضافہ ماہرین کی پیش قیاسی سے تیس چالیس فیصد زیادہ تیز ہے۔ حتمی طور پر نہیں معلوم کہ اس اضافے اور شوگر بھائی بننے کی وجوہات کیا ہیں۔ ماہرین خوب اٹکلیں لگاتے ہیں۔ کوئی کہتا ہے ہماری ترقی اس کی اہم وجہ ہے۔ ترقی ہمیں زیادہ غذا مہیا کررہی ہے اور ہم خوب کھاکر شوگر بھائی بننے کے لیے تیار ہورہے ہیں۔ ترقی ہمیں آرام طلب، آلسی اور فربہ بنارہی ہے۔ ہم پیدل چلنا بھولتے جارہے ہیں۔ کم کام اور زیادہ آرام کرناشوگر بھائی بناتا ہے۔ ٹیلی وژن بھی ہمیں کئی طریقوں سے شوگر بھائی بناتا ہے۔شوگر بھائی بننے کی وجوہات کے بارے میں جاننے لگتا ہوں تو حیرت ہوتی ہے کہ خود اپنے دام میں گرفتار ہوکر ہم شوگر بھائی بنتے جارہے ہیں۔

شوگر بھائی بننا یا شوگر کا مرض اتنا عام ہے کہ اب بچے اور نوجوان تک اس سے متاثر ہیں ۔ ایسے ماحول میں اگر کوئی عاقل و بالغ یہ کہے کہ مجھے شوگر نہیں ہے تو حیرت کے ساتھ شک ہوتا ہے کہ اسے شکر کیوں نہیں ہے۔ ڈاکٹر یقین کرنے کے لیے تیار ہی نہیں ہوتے۔مختلف سوالات کرکے تفتیش کرنے لگتے ہیں۔ یوں بھی ڈاکٹر سے جب کوئی رجوع ہوتا ہے تو نام عمر وغیرہ کے بعد کیاجانے والا سوال یہی ہوتا ہے کہ کیا آپ شوگر بھائی ہیں؟ اگر کسی نے کہا ہے تو پھر ڈاکٹر کی توجہ دوسری شکایات پر مرکوز ہوتی ہے وگرنہ ڈاکٹر مزید کریدنے لگتے ہیں۔ آپ کیسے کہہ سکتے ہیں کہ آپ کو شوگر نہیں ہے۔ آپ نے آخری بار شوگر کا معائنہ کب کروایا تھا۔ آپ کے خاندان میں کس کو شوگر ہے۔ آپ کا وزن کم تو نہیں ہورہا ہے۔ کیا بار بار پیشاب آتا ہے۔ کیا آپ جلد تھک جاتے ہیں۔ وغیرہ وغیرہ۔ سوالات کے جوابات پاکر مطمئن نہیں ہوتے، اطمینان کرنے کے لیے معائنہ تجویز کرتے ہیں۔ معائنے سے اگر شوگر بھائی بن گئے تو فاتحانہ انداز میں کہتے ہیں۔ ’میں نہ کہتا تھا، آپ کو شوگر ہے۔‘

اگر کوئی معائنے میں ’شوگر فری‘ ثابت ہوا تو حیرت کا اظہار ہوتا ہے۔ ’تعجب ہے، آپ خوش قسمت ہیں۔ احتیاط کیجیے۔ کبھی بھی شوگر ہوسکتی ہے۔ دوچار مہنیے بعد پھر معائنہ کروایے ۔‘ اورآخر،جلد یادیر صحت مند شخص کو شوگر برادری میں شامل کرکے ہی دم لیتے ہیں۔ اس میں بے چارے ڈاکٹر کا کوئی قصور نہیں ہے، موجودہ حالات شوگر بھائی چارگی کے لیے موافق ہیں۔

٭ ٭ ٭